٨٠٪ من موسم رمضان بيكون في التلتين الأخرانيين من الشهر الكريم، لأن العشرة الأوائل بيكونوا اكتر في عزومات وتجمعات عائلية وأصدقاء ومعارف.
بعد مرور الأيام الأولى بيبدأ المصريين رحلة في اكتشاف و تجربة مينو رمضان الشهية سواء كان افطار أو سحور، حلو أو حادق.
الأطباق الجانبية رمضانية والأطباق الرئيسية زي ما هيه.
الطبيعي عند الناس في رمضان الأكل الشرقي، فا لو انت مطبخك شرقي أو بيقدم أكل شرقي حظك حلو! موسم رمضان بتاعك.
بس مثلا لو مطبخك ايطالي، هتحتاج تعمل شوية تظبيطات وإضافات رمضانية للمينو عشان تقدر تخدم وتحقق رغبات زوار مطعمك.
مش منطقي أنك تغير أطباقك الرئيسية زي باستا أو ريزوتو بمولوخية أو رقاق. بس ممكن تعمل مقبلات أو عصائر رمضانية أو حتي أطباق حلو خاصة برمضان وتكون تتماشى مع روح مطبخك وأجواء رمضان.
خلي عندك طبق رئيسي بريمو.
سواء كنت مطبخ دولي أو شرقي، أنك تقدم طبق يعتبر اختيار مضمون بالنسبة للزبائن إضافة قوية جدا للمطعم. طبق يكون شرقي ينفع يطلب في أي يوم طول السنة والكل عارفه، الطبق الچوكر ده هوا المكس جريل!
دايما لما الناس تحتار هتطلب ايه من المينو بيروحوا للسهل المضمون، المكس جريل.
خلي الحلو من عند خبير الحلو.
المولتن شوكولات كيك اللي بتعملها خطيرة بس في الغالب معظم الزبائن في رمضان عايزين حلويات شرقية بعد الفطار او مع السحور. وأنك تخلق منيو حلو شرقي كامل شئ غير عملي ومكلف. طب بدل كل ده ممكن تعمل شراكة أو اتفاق مع مكان متخصص في الحلو وتضيف الأطباق ديه في المنيو عندك.
كتر من المقبلات وفواتح الشهية.
دايما المقبلات الرمضانية بتحقق أعلى هامش ربح مقارنةً بالأطباق الرئيسية. حدد الطبق صاحب اعلى هامش ربح و درب من بدري أفراد طاقم العمل على ترشيحه. بالطريقة ديه هتحقق ربحية عالية من اصناف قليلة التكلفة وسهلة التحضير.
وازن بين الفطار والسحور.
في الفترة الأخيرة الناس بدأت تخرج اكتر للسحور عن الفطار وبالتبعية المطاعم بتشتغل اكتر في فترة السحور. الفطار بيكون الطلب لوجبات عالية القيمة في وقت ضيق، أما السحور بيكون فيه وقت اكتر تسمح بزيارات في أوقات مختلفة على حسب مايفضل الزبون والطلب لوجبات اصغر من الفطار ولكن بكميات اكتر. مهم جدا اننا نفهم سلوك الزبائن في كل فترة ونحقق توزان بين الفترتين عشان نوصل لاحسن استفادة طوال الشهر الكريم.
مع إن رمضان وقت صعب للمطاعم لأن المنافسة فيه عنيفة، بس مع المنافسة دي بتتوجد فرصة للمطاعم إنها تشتهر وتحقق ارباح مادية و كمان إنها تبني إسم و شهرة.
عشان نلخص الموضوع بسرعة، خلى الأطباق الجانبية رمضانية والأطباق الرئيسية زي ما هيه. ماتنساش الطبق البريمو، المكس جريل. خلي الحلو من عند خبير الحلو وكتر من المقبلات وفواتح الشهية واوزن بين الفطار والسحور.
